Joriy yilning 21-may kuni Toshkentdagi Singapur menejmentni rivojlantirish institutining tashkil topganiga 15 yil to‘lishi hamda yangi o‘quv binosining rasmiy ochilish marosimi munosabati bilan tantanali bayram dasturi tashkillashtirildi.

Marosimda O‘zbekiston banklar assotsiatsiyasi, Singapur menejmentni rivojlantirish instituti, Sanderlend universitetidan faxriy mehmonlar, mahalliy oliy ta’lim muassasalari rektorlari, xorijiy universitetlarning Toshkentdagi filiallari direktorlari, turli mamlakatlardan kelgan tashkilotlar vakillari ishtirok etishdi.

Tadbirda so‘zga chiqqanlar, jumladan O‘zbekiston banklar assotsiatsiyasi bosh direktori Baxtiyor Hamidov, Singapur menejmentni rivojlantirish instituti prezidenti doktor Erik Kuan, Oliy va o‘rta maxsus ta’lim vaziri Abduqodir Toshqulov hamda Toshkentdagi Singapur menejmentni rivojlantirish instituti rektori Jasur Solihov TSMRI jamoasining 15 yillik muvaffaqiyatli faoliyati bilan samimiy muborakbod etib, institutning shu davr mobaynida qo‘lga kiritgan yutuqlari haqida to‘xtalib, kelajak mutaxassislarini yetishtirib chiqarishdagi ishlariga omad tilashdi.

Mehmonlarga yangi o‘quv binosi bo'ylab tur tashkil etildi, so'ngra “Evrazia” vokal cholg‘u ansambli ishtirokida bayram dasturxoni uyushtirildi.